Mordedoras de mazás
Así titulou Lorena Souto o texto co que participou na presentación de Ata o corazón da mazá, o libro co que Marisol Gándara obtivo a XXV edición do Premio Nacional de Poesía Xosemaría Pérez Parallé.
O texto é precioso: unha reflexión sobre a poesía como fonte da poesía, as antecesoras como fonte da nova escrita e, en particular, a pegada de Eva Veiga nas poetas galegas novas. Pedímoslle a Lorena o texto para compartilo con todos os lectores e lectoras aquí no blog do premio e ela, coa súa xenerosidade de sempre, accedeu encantada.
Velaquí o está: podedes descargalo en formato PDF facendo clic aquí.
Agardamos que vos guste tanto como nos gustou a nós.
Presentación de «Ata o corazón da mazá»
Aquí tendes unhas fotos da presentación de Ata o corazón da mazá, o libro de Marisol Gándara Sánchez que obtivo a XXV edición do Premio Nacional de Poesía Xosemaría Pérez Parallé.
O acto tivo lugar o pasado sábado e contou coa presenza, ademais da autora, de Miguel Anxo Fernán Vello, editor do libro, Lorena Souto, gañadora da anterior edición, e de Eva Veiga, quen fixo a presentación.
Na mesa aparece tamén un representante da Deputación da Coruña, colaboradora do Premio, así como de Gumersindo Gallego, alcalde de Fene e Manuel Romero Rey, Presidente do Círculo Mercantil e Industrial-Unidade de Fene, quen fixo de anfitrión do acto.
A actuación de Airiños de Fene púxolle o peche a un acto que sempre é unha ocasión feliz de celebrar a entrada dunha nova voz no mundo da poesía en lingua galega e un recordatorio constante da figura senlleira de Xosemaría Pérez Parallé.
«Ata o corazón da mazá»
Este é o título co que, finalmente, sae publicado en Espiral Maior o libro co que Marisol Gándara Sánchez obtivo en novembro a XXV edición do Premio Nacional de Poesía Xosemaría Pérez Parallé. O acto oficial de presentación terá lugar este sábado 11 de maio ás 20.00 na sede do Círculo Mercantil e Industrial-Unidade, en Fene. Contará coa presenza, ademais da autora, da poeta Eva Veiga e de Lorena Souto, gañadora da XXIV edición do Prio. Agardámosvos!
Fase de Trema e Mario Regueira finalistas dos premios AELG
O poemario Fase de Trema, de Lorena Souto, gañador da XXIV edición do Premio Nacional de Poesía Xosemaría Pérez Parallé é un dos libros finalistas na categoría de poesía dos premios que convoca a Asociación de Escritores en Lingua Galega para os mellores libros publicados no ano 2012.
Un novo éxito en si mesmo para o libro de Lorena, que xa foi hai pouco finalista dos premios da Asociación de Editores.
Tamén figura na lista o libro O silencio, de Mario Regueira, quen fose gañador do Parallé en 2005.
Vansenos acabando as fotos dos nosos autores e autoras gañadoras do premio para celebrarmos neste blogue cada un dos seus éxitos!!
Lorena Souto e Mario Regueira finalistas dos Premios da Edición
O libro gañador da XXIV edición do Premio Nacional de Poesía Pérez Parallé, Fase de trema, de Lorena Souto, é un dos finalistas dos Premios da Edición 2012, convocados pola Asociación Galega de Editores (AGE) para premiar as mellores obras publicadas no ano.
Pola súa banda, Mario Regueira, gañador da XVIII edición do Premio Nacional de Poesía Xosemaría Pérez Parallé aparece nas listaxes de finalistas con dous títulos.
A novela Outono aquí, publicada por Sotelo Blanco, é finalista na categoría de libros de ficción e libro de poemas O silencio, publicado en Xerais, na de poesía ou teatro.
Desde o Premio Pérez Parallé desexámoslles sorte no reparto final e, en todo caso, dámoslles a noraboa porque chegar aquí xa é un grande mérito. Os gañadores e as gañadoras do Parallé dannos unha e outra vez motivo para estarmos orgullosos deles e do noso Premio.
Acto de entrega da XXV edición do Premio
O sábado tivo lugar o acto de entrega da XXV edición do Premio Nacional de Poesía Xosemaría Pérez Parallé. No acto, Marisol Gándara Sánchez recibíu o diploma acreditativo e mais a peza de cerámica que representa o premio e é obra de Francisco Pérez Porto, fillo de Xosemaría Pérez Parallé.
Na mesa presidencial do acto, acompañando á gañadora deste ano, estivo José Manuel Romero, presidente do Círculo Mercantil e Industrial-Unidade e Gumersindo Galego, alcalde de Fene.
Marisol adiantounos un poema do libro premiado, presentado ao certame co título Testamento poético («aínda que é probábel -comentou-, que finalmente acabe por cambiarlle o título»).
A continuación tivo lugar un pequeno e emotivo recital a cargo de algúns dos gañadores e gañadoras do premio destes últimos anos: Mario Regueira, Susana Aríns, Ramón Neto e mais Lorena Souto.
O acto pechouse cunha actuación do Coro da Ra, dirixido por Ramón Bermejo.
O libro gañador publicarase na colección de poesía Espiral Maior na primeira metade de 2013. Arredor do día das Letras Galegas terá lugar en Fene a presentación oficial.
Marisol Gándara Sánchez gaña o XXV Premio Nacional de Poesía Xosemaría Pérez Parallé
O pasado xoves reuniunse na sede do Círculo Mercantil e Industrial-Unidade de Fene o xurado da XXV edición do Premio Nacional de Poesía Xosemaría Pérez Parallé, conformado por Miguel Anxo Fernán Vello, poeta e editor, Dores Tembrás, poeta e María Rosendo, gañadora da edición do Premio de 2010.
Tras debatir sobre os libros presentados, acordaron finalmente outorgar o premio ao libro presentado co título Testamento poético. Aberta a plica, a autora do libro resultou ser Marisol Gándara Sánchez.
Marisol naceu en Francia en 1981, veu a Galicia con poucos meses e criouse en Ordes. É Licenciada en Filoloxía Inglesa pola Universidade de Santiago de Compostela onde
actualmente cursa estudos de Xornalismo, ademais dun master en Paratradución na Universidade de Vigo. Obtivo diversos premios a poemas ou pequenos conxuntos de textos entre os que destaca a XV edición do Premio Francisco Añón, do Concello de Outes, acadado en 2011. Ten publicado ocasionalmente algúns poemas no magazine dixital Achtung.
A propósito de Testamento poético, a súa autora di que “o poemario está adicado a poeta Eva Veiga e, nela, a todas as mulleres que tiveron e teñen que medrar contra un modelo no que non acaban de encaixar de todo”.
O libro de Marisol Gándara aparecerá publicado o próximo ano na editorial de poesía Espiral Maior. Pero antes, o próximo sábado ás 20.00, farémoslle entrega do diploma acreditativo do Premio, ademais dos 500 € (menos impostos) con que está dotado este ano o Premio. Por último, Marisol recibirá unha peza do ceramista Francisco Pérez Porto, fillo de Xosemaría Pérez Parallé.
Para celebrar o XXV aniversario do certame, o acto contará tamén coa participación de varios dos gañadores e gañadoras dos últimos anos que farán un pequeno recital: Mario Regueira, Xiana Arias, Susana Sánchez Aríns, Ramón Neto e Lorena Souto amosarán o camiño que teñen percorrido despois de obteren o Premio.
O acto pecharase coa actuación do Coro da Ra, dirixido por Ramón Bermejo.
a noiva e o navio
Susana Sánchez Arins, gañadora da XXI edición do Premio Nacional de Poesía Xosemaría Pérez Parallé en 2008 co libro [de]construçom, vén de publicar o seu segundo libro de poemas, a noiva e o navio, en Através Editora. O libro pódese mercar en Imperdível, a tenda on-line da Associaçom Galega da Lingua (AGAL).
Ten un blogue para darlle vida ás cousas que ocorren arredor deste libro. Podedes velo facendo clic aquí.
Mentres tanto, agarda a publicación dun outro poemario, aquiltadas, que verá luz en Estaleiro Editora.
A familia do Premio Pérez Parallé está orgullosa de ver como os autores e autoras que empezaron publicando connosco, van facendo camiño de seu nas estradas da poesía galega.
Noraboa para Susana!
Marilar Aleixandre recomenda o último libro gañador do Pérez Parallé
No blog da editorial Galaxia existe unha columna chamada «Recoméndacho». Nela, un escritor ou escritora aconsella a lectura dun ou varios libros.
Nesta ocasión, traído dun artigo publicado en Sermos Galiza, Marilar Aleixandre recomenda a lectura de Fase de trema, o libro co que Lorena Souto obtivo a última edición do Premio Nacional de Poesía Xosemaría Pérez Parallé.
Afiado como espiña, Fase de trema, o primeiro poemario de Lorena Souto (Espiral Maior): «Preparo comida para catro semanas / e dedícome a morrer todas as súas mortes».
Ramón Neto faise co González Garcés
Ramón Neto, quen no seu día obtivera o Pérez Parallé pola súa obra A estación única dunha illa vén de obter o premio Miguel González Garcés outorgado pola Deputación da Coruña cun libro titulado As Lavandas adáptanse a todo erro de navegación.
O González Garcés ten unha longa e sonora historia e obtivérono, entre outros, Ramiro Fonte, Medos Romero, Miguel-Anxo Fernán Vello, Manuel Álvarez Torneiro, Estevo Creus, Marta Dacosta, Luz Pozo Garza ou Xosé María Álvarez Cáccamo.
Esta nova énchenos de ledicia.
-
categorías
-
arquivo
-
ligazóns
-
